Sedek dina anu I Rare Angon ngae gegambaran anak luh di tanahe, baan jegeg goban gambare ento, tusing kone usape, lantas adaninne kone gambare ento I Lubang Kuri.
Kacerita Ida Sang Prabhu sedek melancaran matetulupan, rauh Ida di tongos I Rare Angone ngangon, kapanggihin lantas gegambaran I Rare Angone ento. Angob Ida Sang Prabhu ngaksi gambare ento, dadiannye kandikain pangangone makejang. “Cerik-cerike, nyen ane ngae gambare ene ?” aturange lantas teken pengangone, I Rare Angon. Ngandika, Ida teken I Rare Angon, “Rare Angon, cai ngae gambare ene ?” “inggih titiang”. Dije cai taen nepukin anak luh buke kene, orahang teken gelah ! “titiang matur sisip Ratu Dewa Agung, ten wenten pisan titiang naenin manggihin jatme marupa asapunike”. “Men dadi cai bisa ngae gambar I Lubang Kuri ?”.
Matur Rare Angon, “Punika sangkaning titiang ngawag-ngawagin, Ratu Dewa Angung”. “Ah gelah tuara ngugu, kema alihang gelah I Lubang Kuri, yen cai tuara nyidayang, mati palan cai !”.
Mare keto pangandikan Ida Sang Prabhu ngeling lantas I Rare Angon mulih, kebone kutange di pangangonan. Teked jumahne takonine kone teken memene, “kenape cai dadi ngeling ?”.
Tuturage lantas undukne, kapangandikayang ngalih I Lubang Kuri teken Ida Anake Agung. Sedih kone bareng memene.
Kacerita jani petenge mare I Rare Angon pules, lantas ia ngipi, ngipi kerauhin Betara, ngandika kone Ida Betara teken I Rare Angon, “cai Rare Angon de cai sedih, ne rurunge ngaje kanginang tuut, tepuk I Lubang Kuri.” Tuah Amonto pangandikan Betarane lantas Ida Mlesat.
Mani semengane, tuturange lantas ipiane teken memene, tur ia morahan lakar luas. Epot memene ngaenang bekel. Disubane pragat lantas I Rare Angon majalan. Pejalane ngaje kanginang, nganti joh pesan, tuun jurang menek gunung, megat-megat pangkung, grembengan, nepukin lantas ia padukuhan.
Ditu lantas ia singgah jumah Jero Dukuhe. Jero Dukuh nyape, “sape sire jerone dados meriki peragaan ?”.
Mesauut I Rare Angon, “Inggih titiang I Rare Angon mawinan titiang meriki, tiang ngutang dewek, nemangkin tiang nunas ice ring jerone genah madunungan”.
“Nah dini cening nongos, apang ade ajake adin ceninge, pianak bapane dini makeengan !” Jero Dukuhe ngelah kone oke luh bajang adiri.
Kacerite suba makelo I Rare Angon ditu, lantas pagelanange teken okane.
Sedek dine anu morahan kone I Rare Angon teken Jero Dukuh, tiang matur ring jerone, “awinan tiang rauh mariki ngutang-ngutang dewek, tiang kapandikayang antuk Ida Anake Agung ngerereh anak luh sane madan I Lubang Kuri, kedeh pisan pakayunan Idane, yan tiang tuara nyidayang tiang pacang kapademang”.
Masaur Jero Dukuh, “ede cening keweh, Bapa matujuin cening tongos I Lubang Kurine, ditu dipucak gununge kaje kangin. Ditu suba tongosne Cening, nanging sengka pesan pajalane kema, krana I Lubang Kuri kagebag baan soroh burone ane galak-galak, mapante-pante tongos gebagane, tanggu beten macan luh muani, ento pengalang-alang anake kema. Yadiapin keto ene Bapa maang Cening manik sesirep, apang prasida Cening nganteg kapucak. Pada di malipetane Cening lantas katangehan, ubera Cening teken Raksasane, ene buin bapa maang manik pangalang-alang, manik tiying, manik blabar, manik api, anggon ngentungin I Raksasa. Yan ento tuara nyidayang, ene manik atmane entungin, pedas I Raksasa mati. Nah, kema Cening majalan, eda Cening sumangsaya !”
Majalan lantas I Rare Angon ngaba manik liu pesan. Suba neked di bongkol gununge, nepukin lantas ia macan pagereng, entungine lantas manik sesirep, pules lantas macane makejang. Buin majalan ia ngamenekang, nepukin kone ia lelipi gede-gede, entungine lantas sesirep pules lelipine makejang.
Tahu duur nepukin I Rare Angon Raksasa dadua luh muani, entungine manik sesirep, pules lantas raksasane makadadua.
Suba pada pules gebagane makejang, prasida lantas I Rare Angon kacunduk teken I Lubang Kuri, ngon I Rare Angon teken kajegegan I Lubang Kurine, sajaan patuh buka goban gegambarane dipangangonan.
Ditu I Rare Angon nuturang unduk I Lubang Kuri, mawanan ia teked kema. Ajakine lantas I Lubang Kuri kanegara, bakal Katur teken Ida Anake Agung. I Lubang Kuri satinut.
Suba kone keto, majalan lantas ajaka dadua nganuunang, Ngungsi padukuhan .
Kacerita I Rare Angon ajake I Lubang Kuri neked jumah Jero Dukuhe suba peteng. Ngandika Jero Dukuh teken I Rare Angon. “Cening Rare Angon, buin mani semengan kema suba Cening mulih aturang I Lubang Kuri teken Ida Sang Prabhu ene adin Ceninge I Luh, Cening suba nyuang ajak ia bareng mulih !” I Rare Angon sairing.
Kacerita mani semengan I Rare Angon, okan Jero Dukuhe muah I Lubang Kuri mapamit, lantas ia majalan.
Kacarita di jalan, mare nyaluk peteng, teked lantas I Rare Angon jumahne kendel pesan kone memene. “Duh rauh Cening pianak meme, pitahen meme Cening lakar tuara sida malipetan.” Epot memene ngebatang tikeh muah ngalihang pabuan.
Disubane pada mategtegan, ditu lantas I Rare Angon nyatua, nuturang pejalane luas ngalih I Lubang Kuri, tur maan kurenan okan Jero Dukuh sakti. Buin manine pasemengan I Rare Angon ka puri ngaturang I Lubang Kuri. Angob maduluran sengit kayun Ida Sang Prabhu teken I Rare Angon, bane nyidayang ngalih I Lubang Kuri. Makayun-kayun Ida Anake Agung. “Yen tusing jeleme sakti, tuara nyidayang apa ngalih I Lubang Kuri. Yan jelemane ene idupang. “Pedas kagungan ideweke lakar uug, nah lakar upayen kapatianne I Rare Angon.”
“Cai Rare Angon kema cai buin luas, alihang gelahe Naga, edot pesan gelahe apang nawang Naga. Kema cai majalan jani !”
Mara keto pangandikan Anake Agung, ngembeng yen peninggalan I Rare Angon, suba ngerasa teken dewek kasengitan baan Anake Agung. Mapamit lantas ia mulih.
Kacerita suba neked jumah, matakon lantas kurenane, “Beli, kenapa sebeng beline dadi masawang sedih, kenken sih tingkah beline tangkil ka puri ?”
Masaut I Rare Angon, “Kene adi, sinah suba baan beli Anake Agung sengit pesan teken beli. Suba beli nyidayang ngalih I Lubang Kuri, jani buin beli kapangandikayang ngalih Naga”.
Masaut ne luh, “Yan bantas aketo, ede beli sanget ngewehang, ne tiang ngelah manik astagina, paican dane I Bapa. Jani tiang ngadakang Naga. Manik Astagina apang ada Naga, ada lantas Naga gede pesan. Nah kema beli ka puri tegakin Nagane ene, aturang teken Ida Anake Agung !” Tegakine lantas Nagane ento ka puri. Teked di puri, sedek Anake Agung katangkil, serab kone anake nangkil.
Suba neked di bancingah nglepat ikut nagane bakat pentala kone candi bentare, aas candi pamedal Ida Anake Agung. Anake di bancingah pada pablesat malaib, takut teken Naga.
Ida Anake Agung mara miring orta dogen suba Ida ngetor, kaling ke ngaksinin, meh Ida lemet prajani.
Lantas Ida malaib tur kepunge teken Nagane. Pamuput Ida sedia kacotot olih I Naga. Kacerita sapandewatan Ida Sang Prabhu, kasub pesan kesaktian I Rare Angon, lantas ia Kaadegang Agung.
Inggih semeton sareng sami, sampunang nulad parisolah Ida Sang Prabhu. Yen irage nulad parisolah Ida Sang Prabhu sinah irage nemu sangsara. Yening malaksane becik sekadi I Rare Angon sinah pacang nemu bagia.
Inggih puputang tityang antuk parama santi.
Om Santih, Santih, Santih Om
» Thanks for reading I RARE ANGON
0 Response to "I RARE ANGON"
Post a Comment
Url:
Email: