I TUUNG KUNING
Inggih, para pamidara, pemekas angga panureksa sane wangiang titiang. Sane mangkin titiang pacang ngewekasang indik satua sane mamurda “I Tuung Kuning”.
Sadurung titiang ngaturang indik daging satua puniki, titiang mataken “sire sane sampun uning satua periindikan satua I Tuung Kuning?”. Yening nenten uning sane mangkin becikang mirengang. Titiang pacang midartayang satua punika. Skewanten ledangang titiang nganggen basa kapara. Kadi asapuniki satuan ipun…
kurungan teken matajen. Tusing taen ngerunguang somah, apa buin pianak. Kaling ke taen tedun ke banjar lan mesesana, jeg joh parane. Saksat kurungane anggone kurenan.
Caritayang imaluan, I Pudak ngelah siap dadua ulian pepes nawang menang metajen, jani siapne I Pudak nyangsang ngeliunang dogen. Meh ade sube penyatusan ia ngubuh siap. Ne ngawinang Men Pudak somah I Pudake keweh. Keranane sai-sai ia tundene maang ngamah siap ane liu totonan. Konden buin ia ngitungang dewekne ane sedeng ngadut belingan gede.
Caritayang jani, I Pudak lakar luas matajen kema ke dajan gunung. Sekonden mejalan, bangras I Pudak mabesen teken somahne. “Ih…Men Pudak! Icang jani lakar luas matajen. Ingetang maang ngamah siape makejang. Buin besik…, yen pet nyai suba ngelekadang pianak yen muani ye lekad, depin ajak jumah piara. Sakewala yen luh ye lekad, jeg tek tek ye dadiang mamaan siap. Icing tusing suka ngelah pianak luh, sing lakar dadi ajak bareng luas metajen. Kenken…! Be dingeh. Jeg kijap-kijap memegeng…?
Ngg…ngg…nggih beli, tiang lakar ngelaksanayang pebesen beline. Keto pesautne Men Pudak sambilange jejeh ngetor. Gelisin satua enggal suba lantas I Pudak mejalan matajen. Yen kudang bulan ia tusing ade mulih. Ceritayang, Men Pudak mase suba nyakit, sebet, rasa madukan dikenehne. Liyang ben pianakne selamet lekad, sebet ngenehang pianakne, sing buungan lakar metektek dadi mamaan siap, sawireh luh ia lekad.
Kambang kenehne Men Pudak ngeling nyelsel dewek… “Cening, ape puaran ceninge, lekad digumine? Ape mirib gede pelih ceninge…, sing buungan cening lakar matiang meme? Kal dadiang cining meme mamaan siap. Ne tuah ngisinin keneh momo bapan ceninge ngulurin indria”. Keto Men Pudak sesai nyesel dewek…, Mara lantas keto, yen ape mirib nuduhang, Men Pudak jeg prejani bingar. Rumasa ia maan daya lakar nyelametang pianakne. “Yeh to Cening lakar kinsanang dajane sik umah dadonge”. Keto dayane Men Pudak.
Gelisin cerita, encol Men Pudak nektek ari-ari pianakne lantas baange siap. Suba lantas keto gegeson ia nyangkol pianakne ane nu barak abane ke umah dadongne. Ceritayang jani, suba Men Pudak neked sik umah memene kali kajane…, jeg mekesiab dadong anak cenik…” Yeh Pudak, to ngudiang nyai ngabe pianak nu barak mai? Kale apa nyai ngelekadang pianak?
Sigsigan Men Pudak mesaut,” Meme, tiang liu ngeraos, cuten ne cucun memene lakar kinsanang tiang dini. Sawireh ipidan ada pebesen somah tiange I Pudak. Yen luh pianak tiange lekad, sing buungan ia lakar metektek dadi mamaan siap.
Engken keneh dadong anake cenik ningehang raos Men Pudak.
Peh…, I Pudak mula mantu bikasne jelekan teken beburon. Nah yen keto depin meme ngajak dini, sakewale ingetang delokin nyen pianak nyaine selid sanja. Lega kenehne Men Pudak ningehang munyin memene, sawireh pianakne ade ane ngempu. Lantas gegeson ia melaib mulihne, jejeh somahne suba teka uli metajen.
Lanturang satua, suba mekelo rarene Men Pudak ajak dadongne… meh ade limang tiban, Lantas baange ia adan I Tuung Kuning. Sadina dina ia ajake, tur urukange nyakan, ajahine nunun, tur ngae banten, jemet I Tuung Kuning melajahang awak, ngajak dadongne.
Tutugang satua, ceritayang I Pudak suba mulih uli metajen saha mantigang krepe, mapan mirib kalah tusing ngabe pamenang. I Pudak lantas ngelur ngaukin Men Pudak ….., Men Pudak,…...Men Pudak, ..!!!!
Encol Men Pudak nyagjag sade jejeh nepukin matane I Pudak barak ngeredep. Ih… Men Pudak, basang nyaine tepukin wake suba engkes. Sinah nyai suba ngelekadang pianak. Icang metakon, apane pianake ?... Luh beli, keto pesautne men pudak banban, men sube tektek nyai bang siap ?... paling men pudak sing bani mesaut ulian jejehne keliwat suba beli suba tetekang tiang Keto Men Pudak mesaut gelip.
Yen apa kaden ngundukang, mare keto jeg prajani siapne mekruyuk buin bisa memunyi care jeleme Bek bek bek kukuruyukkkkk bekbek bek kukuruyukkkk…. Nak Ari arine dogen ane tekteke, pianakne kingesanange jumah dadongne. Mekesiab I Pudak ningeh kruyuk siape memunyi jeleme, buin pedasange teken I Pudak jek siape ane lenan mekruyuk patuh mekeneh I Pudak,…. Sinah wake uluk-uluke ke Men Pudak. Widine mule sing dadi bogbogin.
Prajani ngejer awakne I Pudak naanang basang pedih ….Ih cicing nyai ….., Uli pidan nyai bani nguluk-nguluk wake? Nyai tuah nektek ari-ari dogen, jatine pianake engkebang nyai sik umah dadongne. Saje ape tusing….!!!!
Sa…sa….saje beli. Sing lascaria keneh tiange ngematiang pianak pedidi. Ento awanane tiang bogbog.
Jani, yen sing nyai nyidayang ngajak pianake mulih, sing buungan nyai lakar matiang wake dadi pesilihne. Alih pianake jani….!!!! Keto munyinne I Pudak sahe nuding. Ceritayang jeg encol Men Pudak melaib labuh saget suba neked di jumah memene kali kajane.
Meme… to ngudiang meme ngeling keto munyinne I Tuung Kuning napetang memene gesah bengul teke nelokin. “Cening Tuung Kuning bapan ceninge suba teke uli dajan gunung. Jani cening, oraine mulih. Yen sing keto meme ane lakar matiange”.
“Meme keme mulih maluan, tiang nu nugtugang nunun buin abedik. Nyanan tiang lakar mulih.” Kambang pejalane Men Pudak tusing sida ngajak I Tuung Kuning mulih.
Ceritayang suba neked di jumahne, I Pudak nepukin Men Pudak mulih pedidi “Ne kenken nyai mulih pedidi pianake cen ?”
“Beli I Tuung Kuning anak nu nunun, nyanan kone ia lakar mulih tanpa samandana saget I Pudak nyambak bok ne Men Pudak. Cutet..!!! Alih I Tuung Kuning buin cepok Mejalan!!!!
Buin Men Pudak melaib ngalih I Tuung Kuning. Disubane neked di tongosne I Tuung Kuning dapetange I Tuung Kuning nu mambuh. “Cening, buin meme mai tundene teken bapan ceninge. Apang cening mulih jani”.
Mesaut I Tuung Kuning, “Meme tiang nu mambuh, nyanan tiang lakar mulih. Keme meme mulih maluan”. Engsek sing nyidaang mekeneh Men Pudak sambilange ngojog somahe mepangsegan ngeling. “Beli, I Tuung Kuning ya nu mambuh. Buin nyanan kone ye lakar mulih”.
Rasa mekeplug pebaane I Pudak metindakan aundag, jeg teka I Tuung Kuning ngeraos banban saha mepenganggo sarwa putih. “Bapa tiang jani suba mulih. Apa ane buatang bapa teken titiang?”
“Tuung Kuning, jani nyai lakar ajak bapa luas ngajanang. Konden maan mesaut I Tuung Kuning, saget limane I Tuung Kuning jemake geredege ajake mejalan.
Lanturang satua, suba lantang pejalane I Pudak ajak I Tuung Kuning, ceritayang neked ia di jaban pura misi meru metumpang solas. Ditu ade masi punyan bingin gede. Lantas meorahan I Tuung Kuning teken bapane. “Bapa…, ajak je tiang ngetis akejep di beten bingine, tiang suba kenyel pesan mejalan”.
“Tuung Kuning, mula ditu tongos nyai lakar ngetis sekayang-kayang”. Bengong I Tuung Kuning nututin pejalan bapane saha matakon. “Bapa, apa artine tiang ngetis sekayang-kayang?” “Iih…., Tuung Kuning, dini suba tongos nyaine lakar matiang bapa, kal metektek dadiang mamaan siap, sawireh bapa sing suka ngelah pianak luh”.
Merasa teken dewek lakar mati, jeg masaut I Tuung Kuning ngasih-asih. “Bapa, yen keto keneh bapane, lautang suba matiang tiang. Dewek tiange mula tuah bapa ane nguasaang”.
Ceritayang I Pudak suba nganggar madik ngelelam. Sadia lakar nyepeg pa samandana, jeg uli dije rauh dedari ngindang nyaup melaibang I Tuung Kuning. Salinine aji gedebong. Iteh kone I Pudak nektek gedebonge kadene awakne I Tuung Kuning. Disubane merecah recah, tektekane ento lantas abane mulih baange ngamah siapne. Disubane siapne pada maan ngamah, jeg seka besik siapne mati nganti telah mesisa guungan dogen.
Ditu lantas I Pudak mare nyelsel teken pedewekan kelikut momo keraksasan. Metegtog ia negak ngame ame Widhi Sang ngawiwenanang jagate. “Ratu Hyang Widhi, dados aspuniki puaran titiang maurip. Pianak pengantungan urip dados pademang titiang”. Keto penyelsel I Pudak sambilange ngungsi wit bingine, tongos ia merasa ngematiang I Tuung Kuning. Peteng lemah I Pudak ngeling sing inget medaar, ngipitang pianakne ane suba matiange.
Caritayang jani, I Tuung Kuning sedek di suargan sedih nepukin bapane kesakitan di mercapada. Ditu lantas I Tuung Kuning, nunas teken widiadari apang temuange buin teken bapane di mercepada.
Gelising satua, kadagingin lantas pinunasne I Tuung Kuning, teken dedarine. Laut I Tuung Kuning keberange teken dedarine kecunduk ajak bapane. Mekesiab I Pudak kadirasa kepupungan nepukin I Tuung Kuning ade di arepane.
“Bapa…, suud bapa nyelsel raga, tiang pianak bapa I Tuung Kuning teke anak nu idup. Mapan ipidan tiang pelaibange ke suargan teken widiadarine.
“Uduh… cening, cening pianak bapa. Ampurayang bapa kepetengan buka jani tusing inget teken pianak. Ape, mirib ane ngundukang bapa, buka kene”. Keto pariselsel I Pudak sambilange ngelut nekekang I Tuung Kuning.
“Cening I Tuung Kuning, jani lan mulih ajak bapa…, pang tawange teken memen ceninge, sujatine cening tusing mati. Tugtugang satua, teked lantas I Pudak lan I Tuung Kuning jumahne. Ngeranayang memene kendel, bingar nepukin I Tuung Kuning nu idup. Saget biur ortane di pakeraman nganteg ke puri agung, unduk I Tuung Kuning, kone nawang suargan.
Mapan ada pikarsan Ida Dewa Agung di Puri, kedeh apang uning perindikan I Tuung Kuning, ditu lantas Ida ngadakang putusan, apang sida nyaak I Tuung Kuning tangkil ke Puri.
Ceritayang jani, I Pudak lan I Tuung Kuning suba tangkil di ajeng Ida Dewa Agung, saha ngaturang indik kawentenan daging suargane. Ngawinang angob kayun Ida Dewa Agung mirengang.
Suba lantas nyarik atur I Tuung Kuning, jeg prejani Ida ngetelang wecana teken I Pudak. “Pan cening, cutet jani I Tuung Kuning lakar arsaang nira, lakar anggo nira rabi. Buine pan cening icen nira kawiwenangan dadi prebekel dini di desa pradesa. De pesan pan cening tulak”. Keto pangandikan Ida Dewa Agung.
Gelisin satua, I Pudak misadia ngaturang I Tuung Kuning, ngelantas mepamit metaki-taki lakar ngenterang desa dadi prebekel. Mekelo-kelo sida bane I Pudak ngenterang desa ngawinang desane sukerta. Saksat nebus kepelihan imaluan. Keto mase I Tuung Kuning sida ngeledangin kayun Ida Dewa Agung di Puri.
Nah cerik-cerike ajak mekejang, de nyen nuutang solahne I Pudak. Krana yening cerik-cerike nuuting solahne I Pudak cerik-cerike bakal kena sanksi merupa 303 KUHP.
Inggih para pamidara sareng sami, wantah asapunika sida katur antuk titiang indik daging satua I Tuung Kuning. Dumadak suksman satua punika wenten pikenoh ipun angge gegambelan ngemargiang kahuripane nyujur kerahajengan lan kasukertan. Kirang langkung titiang nunas pengampura. Pinaka wasaning atur sineb titiang antuk Parama Santhi.
» Thanks for reading SATUA BALI
apa tema sama kesannya.
ReplyDeleteRespect and I have a tremendous offer you: How To Renovate House Exterior Spam Detected! Link aktif otomatis terhapus!!!
ReplyDelete